काठमाडौँ — शिक्षा, विज्ञान तथा प्रविधिमन्त्री विद्या भट्टराईले देशभरका विद्यालयहरूलाई शैक्षिक व्यवस्थापन सूचना प्रणाली (ईएमआईएस) मा आफ्ना तथ्यांक र सूचना राख्न आग्रह गरेकी छन् । उनले शनिबार साँझ सामाजिक सञ्जालमार्फत देशभरका विद्यालयहरूलाई प्रणालीमा सही, शुद्ध र समयमै विवरण अद्यावधिक गर्न अनुरोध गरेकी हुन् ।
शिक्षा, विज्ञान तथा प्रविधि मन्त्रालयले निर्माण गरेको सो प्रणाली विद्यालय शिक्षासम्बन्धी तथ्यांक व्यवस्थापनका लागि एकीकृत डिजिटल प्रणाली हो । पूर्णरूपमा अनलाइन आधारित यस प्रणालीमा विद्यार्थीहरूको व्यक्तिगत विवरण, उपलब्धि विवरण, विद्यालयको प्रोफाइल, भौतिक पूर्वाधार, विपद् व्यवस्थापन, वैकल्पिक सिकाइ तथा परीक्षा व्यवस्थापनसम्बन्धी विवरण अद्यावधिक गर्न सकिने मन्त्री भट्टराईले जनाएकी छन् ।
पाठ्यक्रम विकास केन्द्रको मूल्यांकनको ढाँचामा सबै कक्षाको वार्षिक र त्रैमासिक परीक्षाका कार्यहरू यसै प्रणालीमार्फत गर्न सकिने पनि उनले अवगत गराएकी छन् । ‘नेपाल सरकारबाट व्यवस्थापन भएको यस डेटाबेस प्रणालीमा प्रविष्ट गरेको तथ्यांकको आधारमा संघीय सरकार, प्रदेश सरकार र स्थानीय सरकारले आ-आफ्ना योजना तथा वार्षिक कार्यक्रमहरू निर्माण गर्दछन्,’ उनले लेखेकी छन्, ‘विद्यालयले सहीरूपमा तथ्यांक प्रविष्ट गरेमा मात्र सही सूचकहरू बन्छन् र राज्यले बनाउने योजनाहरू पनि तथ्यपरक हुन्छन् ।’
आईईएमआईएस प्रणाली सरकारी भएको र तथ्यांकको केन्द्रीय भण्डारण गरिने भएकाले तथ्यांक हराउने वा नासिने जोखिम न्यून रहेको मन्त्री भट्टराईले स्पष्ट पारेकी छन् ।
Ram Chandra Ghimire
2025 © Education Manch. All Rights Reserved.
