कपिल ज्ञवाली
सिद्धार्थनगर, फागुन २ गते । प्रतिनिधिसभाका उपसभामुख इन्दिरा राना मगरले शिक्षा बिनाको मान्छे सुगन्ध बिनाको फूल जस्तै हुने टिप्पणी गर्नुभएको छ । उहाँले समय सापेक्ष डिजिटल शिक्षामा अघि बढेर युग सुहाउँदो शिक्षा आर्जन गर्न विद्यार्थीहरुलाई आग्रह गर्नुभयो ।
रुपन्देहीको बुटवलस्थित क्यानन माध्यमिक विद्यालयको २८ औँ वार्षिकोत्सव तथा रजत जयन्ति २०८१ को अन्तर्राष्ट्रिय सम्मेलन केन्द्रमा उद्घाटन कार्यक्रमलाई सम्बोधन गर्नुहुँदै रानाले बालबालिकाको पहिलो शिक्षक अभिभावक र दोस्रो शिक्षा दिने स्कुल रहेको उल्लेख गर्नुभयो ।
उपसभामुख रानाले विद्यार्थीलाई इमानदार, सादगी र सदाचारी बन्न समेत आग्रह गर्नुभयो । उहाँले भन्नुभयो, ‘‘अहिलेको शिक्षालाई संसारभर प्रतिस्पर्धा गर्न सक्ने खालको बनाउनुपर्छ, यसमा बुटवलको क्याननले गरेको अभ्यास अनुकरणीय छ ।’’
अहिले टेक्नोलोजीले संसार सानो बनाएको छ, संसारका सबै गतिविधि एकै छिनमा सबैले जान्न र हेर्न सक्छन्, त्यसैले आँट र शाहस गरेर अघि बढ्नुपर्ने उहाँको भनाइ छ ।
उहाँले शिक्षाले तोपले जस्तै परिवर्तन ल्याउने उल्लेख गर्नुभयो । उहाँले भन्नुभयो, ‘‘जहाँ शोषण हुन्छ त्यहा क्रान्ति हुन्छ, शिक्षाले परिवर्तन आउछ, शिक्षा पनि तोप जस्तै हो ।’’
रानाले नेपाल सुन्दर रहेको उल्लेख गर्नुहुँदै भन्नुभयो, ‘‘हामी माटोबाट आएको माटो मै जाने हो, प्रकृति संरक्षणमा जुट्नुस्, नेपाल देश सुन्दर छ, देश भित्र घुम्नुस्, देश बाहिरभन्दा देश नै सुन्दर छ, मैले संसारका धेरै देश घुमेर हेरेको छु ।’’
सो अवसरमा क्याननले नगद ५१ हजारसहित उपसभामुख राना मगरलाई अभिनन्दन गरेको थियो । त्यस्तै, राष्ट्रिय क्रिकेट खेलाडि देव खनाललाई अनुबन्धन समेत गरेको छ । सो अवसरमा पत्रकारिता क्षेत्रबाट शिक्षा र समाजलाई जोड्न उल्लेखनीय भूमिका निर्वाह गरेको भन्दै गोरखापत्रकर्मी कपिल ज्ञवालीलाई नगद १० हजार, दोसल्ला तथा प्रसंशापत्रले सम्मान गरिएको थियो । त्यस्तैगरी क्यानन माविका संस्थापकहरु, उत्कृष्ट शिक्षक, कर्मचारी, सहयोगी सबैलाई प्रसंशापत्र, करुवा तथा दोसल्ला ओढाएर सम्मान गरिएको थियो ।
प्राचार्य शंकर भण्डारीले विद्यालयलाई समय सापेक्ष परिवर्तन गरेर अघि बढ्नका लागि नयाँ भिजन तयार पारिएको उल्लेख गर्नुभयो । उहाँले अबको पाँच वर्षमा रुपन्देहीको नम्बर वान स्कुलका रुपमा परिवर्तन गरेर देखाउने दाबी गर्नुभयो ।
यसैगरी, कार्यक्रममा राष्ट्रिय परिक्षा बोर्डका प्रमुख रोमाकान्त तिवारी, प्याब्सन लुम्बिनी प्रदेशका अध्यक्ष लालहरि पाण्डे, अभिभावक संघका अध्यक्ष लोकनाथ ज्ञवाली, विद्यालयका अध्यक्ष थानेश्वर पौडेल, प्रबन्ध निर्देशक दिपक पौडेल, प्राचार्य शंकर भण्डारी, सञ्चारकर्मी सुमन श्रेष्ठ लगायतले आआफ्नो धारणा राख्नुभएको थियो ।
Ram Chandra Ghimire
2025 © Education Manch. All Rights Reserved.
